അമ്മതന്‍ വാല്‍സല്യവും
അച്ഛന്റെ സാമിപ്യവും
അടുത്തിരിക്കുവോളം
അത്രമേല്‍ വേറെന്തുവേണം
ആനയ്ക്കറിയില്ല വലിപ്പമെങ്കിലും
ആളുകളറിയുന്നു ആകാരം
ആദിയും അന്ത്യവും അന്ധകാരം
ആരറിയുന്നു ജഗത്തിന്‍രഹസ്യം
ഇന്നും ഇന്നലെയും നാളെയും
ഇഴചേര്‍ന്നു നെയ്യുന്നു ജീവിതം
ഇണപിരിയാതെ കഴിയേണം
ഇമയടയുന്നതുവരെയെങ്കിലും
ഈശ്വരനെ തേടിയലയുന്നു
ഈച്ചപോല്‍ പാറിപ്പറക്കുന്നു
ഈര്‍ച്ചവാളിന്റെ മൂര്‍ച്ചപോല്‍
ഈശ്വരന്റെ വിധിന്യായങ്ങള്‍
ഉണര്‍ന്നിരിക്കുന്നു മരണം
ഉറങ്ങുന്ന ജീവന്റെയരികില്‍
ഉച്ഛ്വാസനിശ്വാസങ്ങളില്‍
ഉറവപോല്‍ ഒഴുകുന്നു ജീവിതം
ഊഞ്ഞാലിലാടുന്ന പൈതല്‍
ഊറിയൂറിച്ചിരിക്കുന്നു വൃഥാ
ഊതീയരിക്കുന്നു കനലുകള്‍
ഊറിച്ചിരിക്കുന്നു കനവുകള്‍
ഋതുക്കള്‍ മാറീമറയുന്നു
ഋതുമതിപോല്‍ സുന്ദരം
ഋഷിവര്യനെപ്പോല്‍ വശ്യം
ഋഷഭംപോല്‍ സൗമ്യമീ ഭൂമി
എത്ര കരഞ്ഞാലും ചിരിച്ചാലും
എത്തുമോ ജീവന്റെ മറുകരയില്‍
എത്രനാള്‍ കൊതിച്ചിരുന്നാലും
എത്തുമോ ജീവിതലക്ഷ്യത്തിലായ്
ഏഴുസ്വരങ്ങളും മീട്ടിപ്പാടുന്നു പൈങ്കിളി
ഏഴുവര്‍ണ്ണങ്ങളും ചാലിച്ചെഴുതുന്നു വാനം
ഏണിയും പാമ്പും കളിക്കുന്നു ജീവിതം
ഏറിയാല്‍ പാമ്പിന്റെ വായിലായ് ജീവിതം
ഒന്നുചിരിക്കുവാന്‍ ഒന്നിച്ചിരിക്കുവാന്‍
ഒന്നായിത്തീരുവാന്‍ കൊതിക്കുന്നു
ഒടുങ്ങാത്ത ദാഹമായ് മോഹമായ്
ഒരുമാത്രയെങ്കിലും ജന്മസാഫല്യമായ്
ഓര്‍ക്കുവാനാവില്ലയെങ്കിലും
ഓര്‍ത്തെടുക്കുന്നു ഓര്‍മകള്‍
ഓമനിക്കുന്നു ഹൃദയത്തിലായ്
ഓരോ രാവിലും നിദ്രാവിഹീനമായ്
കവിതയായിത്തിരുന്നു ജീവന്‍
ഖരമായുള്ളത് ജലമായിമാറുന്നു
ഗതിയറിയാതെ ഗഗനചാരിയായ്
ഘടികാരപോല്‍ മിടിക്കുന്നു ഹൃദയം
ചരിത്രമാകുന്ന മനുഷ്യജന്മങ്ങള്‍
ഛിദ്രമാക്കുന്നു ചരിത്രശേഷിപ്പുകള്‍
ജീവിക്കുവാനായി നെട്ടോട്ടമോടുന്നു
ഝടുതിയില്‍ ആടുന്നു വേഷങ്ങള്‍
ടവറുകള്‍ പൊങ്ങുന്നു ആകാശത്തിലായ്
ഠേഠേ പൊട്ടുന്നു വെടി അതിര്‍ത്തിയില്‍
ഡ്രാക്കുള ചിരിക്കുന്നു മൊബൈലിലായ്
പ്രൗഢമായ് പറക്കുന്നു വാനില്‍ പതാക
തമസ്സില്‍ വിളങ്ങുന്നു പ്രത്യാശാകിരണം
കഥാകഥനംപോല്‍ ജീവിതഗാഥകള്‍
ദാനമായി കിട്ടിയ ജന്മം, നല്‍കണം
ധനമായും സ്‌നേഹമായും ജീവിതത്തില്‍
പാതിവെന്ത അരിപോല്‍ കഠിനം
ഫലമില്ലാതെയീ ജീവിതചര്യകള്‍
ബോധമില്ലാതെ ബോധിയായിത്തീരുമോ
ഭംഗം വരുത്താതെ ഭോഗം ശമിക്കണം.
