പെയ്യുന്നു മഴ വികൃതിയായ്
തിരയുന്നു കുട തകൃതിയായ്
മറന്നുവച്ചെന്ന് മനസ്സ് പറയുന്നു
എവിടെ വച്ചെന്ന് ഓര്മയുമില്ല
ഷാപ്പിലും ഷോപ്പിലും ചോദിച്ചു
വായനശാലയിലും ചായക്കടയിലും
കണ്ടവരോടും വന്നവരോടും
പോയവരോടും തന്നോടുതന്നെയും
ദിവസങ്ങള് മാസങ്ങള് - വര്ഷവും
വേനലും വസന്തവും ഗ്രീഷമവും
ഋതുക്കള് മാറിമറിഞ്ഞുപോയ്
കുടപോയ വഴി കുടംപോയ വഴിയോ
കാണുന്ന കുടയും കുടയുടെ പിടിയും
എത്തിനോക്കിയും ഒത്തുനോക്കിയും
വള്ളിയും പുള്ളിയും ചിത്രങ്ങളില്
പിടിയില്ല ഒന്നുമേ വടിയായിത്തീരുന്നു
കുടപോയ സങ്കടം കുടഞ്ഞെറിഞ്ഞെങ്കിലും
കുടപോലെ നിവരുന്നു സങ്കടം പിന്നെയും
മൂലയ്ക്കിരിക്കുന്ന കറുപ്പു ബാഗിലായി
മൂലയ്ക്കിരിക്കുന്നു ചുരുണ്ടുകൂടിയങ്ങനെ
കാലനെപേടിച്ച കാലത്തെപോലെവേ
നെഞ്ചോടുചേര്ത്തും കയ്യിലൊതിക്കിയും
തുറന്നും നിവര്ത്തിയും കമിഴ്ത്തിയും
കണ്ണോടുകണ്ചേര്ത്തും പാര്ത്തും
നോക്കിയിരുന്നു മഴവില്ലഴകിനെ....
No comments:
Post a Comment